Почитувани, Интернет сајтот е креиран со цел да Ве запознае со поставеноста, улогата и начинот на функционирање на Агенцијата за регулирање на железничкиот сектор. Железничкиот транспорт е значаен логистички сегмент во економијата и развојот на општеството. Со либерализацијата на железничкиот сообраќај во Република Северна Македонија се поддржува и глобализацијата на општеството. Задача на Агенцијата е промоција на овој транспортен систем кој е економски најповолен сообраќаен систем за Република Северна Македонија како континентална земја, како за товарниот така и за патничкиот сообраќај а воедно и пријателски ориентиран кон човековата околина. Агенцијата за регулирање на железничкиот сектор има значајна улога во либерализацијата на железничкиот сектор во Република Северна Македонија, а со тоа и во воведување на конкурентнција меѓу транспортните компании на пазарот на железнички услуги. Агенцијата го обезбедува и недискриминаторскиот однос на управителот на Инфраструктурата кон сите транспортни компании . Се надевам дека на нашиот сајт ќе најдете потребни и корисни информации од областа на железниците кои ќе Ви овозможат да ги реализирате Вашите потреби.

Железниците во Македонија – значаен сегмент во развојот на стопанството во Македонија, но и со политичко значење. Првата ж. линија во Македонија е Солун–Велес–Скопје кон Белград. Почнала да се гради со странски капитал во 1871, а до Скопје била завршена во 1873 г. Во 1888 била поврзана со српските железници на граничниот премин Забевче кај Врање. Ж. линија Скопје–К. Митровица била завршена во 1878 г., а Солун–Воден–Лерин–Битола во 1894 г. Во текот на Првата светска војна, за потребите на своите армии, германските и бугарските власти ја изградиле тесната линија (60 цм) Градско –Прилеп–Битола (преку Плетвар) и Скопје–Гостивар–Кичево– Охрид–Струга. Во 1925-1926 г. била изградена линијата Велес–Кочани, а во 1931 Велес–Прилеп–Битола. По 1945 г., покрај обновата, била изградена и нова варијанта на ж.л. Клисура–Миравци, во 1951–1956 г. ж.л. Скопје–Тетово–Гостивар–Кичево, како и Зајас–Тајмиште (1966). Иницијативи за железничко поврзување на Македонија кон Бугарија, имало од турската (1912), од бугарската (1943) и од македонската власт (1946). Во 1992 г., со одлука на Владата на РМ почнала градбата на ж. линија Скопје–Софија, која, меѓутоа, не е завршена..